mother 29
|
ПЕДИЈАТРИЈА извор дневник
Третиот крајник се оперира по 4-та година
Не треба да се вадат крајниците ако детето има алергичен бронхит или астма
Во хронични инфекции на горните дишни патишта спаѓаат: воспаление на крајниците, третиот крајник, синусите, ушите и гркланот. Една од причините за хроницитетот е намалена одбранбена моќ кај детето. Многу битен специфичен одбранбен механизам е имунитетот.
Горните дишни органи се најбогати со лимфно ткиво, кое учествува во имунитетот. Крајниците служат како филтер од сите агресивни инхалирани честици од надворешната средина. Ако овој филтер е инфицуентен (извадени крајници), инхалираните честици навлегуваат во долните дишни патишта и предизвикуваат воспаление. Најбитна функција на ова лимфно ткиво е локалната имунолошка активност. Тоа продуцира секреторни имуноглобулини, меѓу кои најважен е секреторниот имуноглобулин А. Причинители на хроницитетот на горните дишни патишта се повторувачки вирусни, бактериски и алергични воспалителни процеси. Амбулантскиот лекар многу често се сретнува со овој проблем.
Воспаление на крајниците може да има акутен, рецидивен и хроничен карактер. Акутно воспаление на крајниците - ангина, е честа појава во детската возраст, а како причинител е стрептококус бета-хемолитичен од групата А. Секундарни причинители можат да бидат сите респираторни вируси. Клиничките знаци се со брз почеток, со многу висока температура, со болки во грлото при голтање и со главоболка, изразени црвени и зголемени крајници со гнојни чепови, малинесто-црвен јазик, зголемени и болни лимфни јазли на вратот. Со терапијата, акутниот процес комплетно се смирува. Ако имаме често повторување на воспаление на крајниците, го нарекуваме рецидивно (повторувачко) на двата и на третиот крајник. Рецидивниот воспалителен процес е со иста клиничка слика предизвикан од стрептокок и трае подолго време. Воспалението се повторува три-четири пати во сезоната и комплетно се повлекува со антибиотска терапија. Лабораториските параметри се нормализираат, крајниците се намалуваат и лимфните жлезди се губат. Таквите деца треба да бидат под постојана контрола од својот лекар.
Хроничното воспаление на трите крајници е со чести атаки на воспалителен процес. И по антибиотската терапија процесот перзистира со сите клинички и лабораториски параметри. Крајниците се зголемени, некогаш комплетно го опструираат грлото и поради тоа е отежнато голтањето и дишењето. Детето дише со отворена уста и ?рчи во легната положба. Нема апетит, слабее и повремено качува температура. Таквите деца имаат специфичен вид на лицето: со подочници, спуштена долна вилица, назален говор. Поради комплетната опструираност дишењето е многу отежнато, особено ноќе. Во сон настапува губење на дишењето, т.н. слипапнеа. Дијагнозата се поставува со клинички наод, се следи хроничниот тек, со лабораториски испитувања, антистрептолизинскиот позитивен тест. Терапијата е антибиотска и долготрајна. Ако процесот долго трае и нема успех со антибиотската терапија, треба да се направат алерголошки испитувања за да се исклучи алергичната компонента, која го влошува воспалителниот процес. Ако има знаци за хронично воспаление на третиот крајник, индикациите за оперативен третман се само по четвртата година на животот. Третиот крајник треба да се извади ако има хронично воспаление на синусите, ушите и оштетување на слухот, а нема ефект од антибиотската и локална терапија. Индикацијата за операција ја поставува матичниот педијатар во консултација со имунолог, алерголог, педијатар. Пред оперативниот зафат детето треба да направи комплетно имунолошко и алерголошко испитување и да се следи најмалку шест месеци до една година. Оперативниот зафат се врши најмалку два месеца по акутниот воспалителен процес и спроведена антибиотска терапија. Не треба да се вадат крајниците ако детето има алергичен бронхит или астма. Апсолутни индикации за операција на двата крајника се тумор на крајникот, туберкулоза, комплетна опструираност на грлото, гноен воспалителен процес зад крајниците и ако детето има воспалени крајници од бета-хемолитичен стрептокок над 4 пати годишно.
< Поракaта ја уредил big_mama817 -- 30.10.2009 14:31:54 >
|
Рингераја.мк користи "колачиња" за обезбедување подобро корисничко искуство, следење на посетеноста и приказ на огласи. Поставките за прифаќање на колачињата ги прилагодувате во вашиот пребарувач.
Дознајте повеќе.
Испечати
