Здравото семејство, како примарна група во општеството која овозможува сигурност, чувство на припадност и емоционална блискост на своите членови, е од суштинско значење за правилен раст и развој на децата

Под родителство обично се подразбираат низа задачи кои таткото или мајката ги имаат, а се во врска со грижата за детето. Меѓутоа, родителството е далеку поширок поим. Успешното родителство не подразбира само обезбедување најсоодветна исхрана и нега, туку треба да придонесе и за јакнење на природната врска меѓу родителите и децата и поттикнување како на моторниот така и на психичко-емоционалниот и интелектуалниот развој уште од најраното детство.Најнапред, тоа опфаќа низа различни развојни промени што од мажот ќе „создадат“татко,а од жената мајка. Овие индивидуални развојни промени се однесуваат на формирањето на идентитетот на родителите, развојот на работниот модел на родителската грижа и реорганизација на дотогаш формираните улоги, со цел новата, родителска улога да добие централно место на некое пократко или подолго време.

 

Меѓутоа, сe  почесто сме сведоци дека илјадници идни родители одговорите најчесто ги бараат во нивното поблиско семејно опкружување и нивните претходни генерации, меѓутоа со префрлување на одговорноста, родителството повторно како да ја нема централната улога во нивниот живот.

 

Во поразвиените земји пак, станува сe поактуелен трендот прашањата и дилемите врзани со родителството да се решаваат преку некоја друга форма, односно идните мајки и татковци одговорите ги бараат од стручните лица и специјализираните школи за родителство кои ќе им го олеснат патот на родителството.Се разбира, помошта од останатите членови на семејството ни таму не е изоставена, меѓутоа несомнено е дека семејните ресурси ќе бидат подобро искористени доколку и поширокото семејство има пристап до програмите коишто на родителите им овозможуваат да прават здрави избори и да донесуваат одлуки кои се во најдобар интерес за нивните деца.

 

Здравствената заштита на жената во врска со бременоста, породувањето и мајчинството во нашето опкружување се фокусира во најголема мера на индивидуалната работа со трудниците, кога лекарот специјалист по гинекологија и акушерство и сестрата акушерка извршуваат цела низа прегледи, а сè со цел да се спречи појава на ризик за трудницата и плодот и да се овозможи раѓање на живо и здраво дете. Во врска со тоа, индивидуалниот контакт во советувалиштето или во семејството со патронажната сестра се користи и за едукативна, здравствено воспитна работа и за давање совети во врска со правилната исхрана, начинот на живот и работа за време на бременоста и сл. Меѓутоа, во советувалиштето за трудници, како и со една посета на патронажната сестра во семејството, нема доволно време за да се одговори на многуте прашања на трудниците, ниту пак да се научат одредени вештини што се потребни за родителството. Вообичаено е тоа што поголем број од идните родители имаат слични дилеми и потреба од слични совети, бараат одговори на исти или слични прашања, особено поврзани со текот на бременоста, породувањето, периодот после породувањето и негата на новороденчето. Трудниците бараат совети од своите гинеколози, акушерки и патронажни сестри, пребаруваат на интернет, читаат најразлична литература и разменуваат мислења со своите другарки, со цел да соберат што е можно повеќе информации за тоа, што да прават или што да избегнуваат за да родат здраво дете.

 

Улогата на Школата за родителство е да пружи поддршка и да ги охрабри идните родители за успешно родителство, за усвојување здрав начин на живот за време на бременоста, после породувањето, како и во периодот на лактација, правилна нега и исхрана на детето, со посебен акцент врз значењето на доењето како незаменлива исхрана во првите шест месеци од животот.

 

Aктивностите на Школата подразбираат едукација на идните родители со цел да се совладаат вештините поврзани со исхраната и негата на трудниците, новороденчињата и доенчињата, подготовка на трудниците за породување и сите аспекти кои се однесуваат на успешно родителство, а се извршуваат од 7-от до 9-от месец на бременоста.

 

Токму вакви школи за родителство во Македонија ќе отвори Роса кон крајов на годинава, а првите ќе бидат лоцирани во Поликлиниката „Јане Сандански“ во Скопје, Клиничката болница во Битола и Општата болница во Гостивар.Всушност, веќе е во тек кампањата преку која од секое продадено шише Роса од 1,5 л ќе се издвојува по 1 денар, а средствата ќе бидат наменети за комплетно опремување на овие 3 школи.

 

Целта на целиот овој проект е токму едукација на идните родители и останати членови од семејството како да се справат со секојдневните предизвици што ги носат нивните нови улоги и всушност да им се овозможи на македонските идни родители еден посовремен и постручен пристап за обезбедување одговори поврзани со родителството.

 

Роса е одговорен бренд и поддршката за отворање на школите за родителство е мотивирана од желбата да се поддржат родителите, новороденчињата и децата. Всушност стабилното опкружување, коешто помага и поттикнува, претставува основа за здраво и безбедно растење е мисијата која Роса транспарентно ја спроведува веќе години наназад.