mis.
|
Стомачна болка (абдоминална колика) кај децата Стомачните болки се честа тегоба кај децата од сите возрасти. Овој симптом заслужува полно внимание на лекарот и навремено диференцирање на многубројните причини што можат да бидат од органско или од психолошко потекло. Но треба да се истакне дека етиолошката дијагноза може да биде многу тешка, дури и со најдобрите дијагностички можности. Под слика на болка во стомакот, освен заболувања на абдоминалните органи (црева, желудник, бубрези, генитални органи), можат да се кријат и други заболувања, како што се шеќерната болест (дијабетична кетоацидоза), воспаление на долните партии на белите дробови или плеврата итн. Честотата на поединечните причини зависи од возраста на детето. Но, најбитно е во првичната процена точно да се одреди дали станува збор за заболување што бара итно, хируршко лекување или станува збор за проблем кој не е ургентен и се третира конзервативно. Од особено значење за дијагнозата се податоците што родителот или детето ги даваат на лекарот во врска со местото, карактерот, јачината и траењето на болката, како и за евентуалните придружни манифестации (температура, повраќање, пролив, кашлица, слабеење, крв во урината). Во периодот кога се новороденчиња кај голем број од бебињата се јавуваат грчеви во стомачето, наречени инфантилни колики што се резултат на навикнување на стомакот на храна или голтање воздух при цицање. Болките се јавуваат секојдневно, речиси во исто време. Бебето почнува силно да плаче и да ги собира нозете, а по испуштање столица или гасови болката спонтано поминува. По смирување на болката, новороденчето е во добра општа состојба. Но, имајќи предвид дека во периодот кога се новороденчиња и доенчиња се можни и заболувања што бараат хируршка разврска (преплет на црева, вклештување кила и друго), а се манифестираат со стомачни болки, неопходно е бебето да биде прегледано од педијатар. Во подоцнежната предучилишна и училишна возраст најчести причини за болки во стомакот се гастроентералните инфекции проследени со пролив, и повраќање, некогаш и со температура. Во оваа возраст треба да се мисли и на цревните паразити, особено ако болката не е нагла туку подолго трае, и е проследена со јадеж околу аналниот отвор (чмарот). Притоа, детето може да биде со послаб апетит и слабокрвно. Постоење на воспаление на желудочната слузница (гастритис) или чир во желудникот и дуоденумот се карактеризира со појава на болка во горниот дел на стомакот (под лажичката), врзана е со земање храна и може да биде следена со чувство на печење (киселина). Училишната возраст е време кога децата можат да заболат и од посериозни воспалителни болести на цревата (Кронова болест, улцерозен колит). Кај овие заболувања освен болки во стомакот постои и позначајно нарушување на општата состојба, како и појава на крв и слуз во столицата. Абдоминалната колика е еден од симптомите што се јавуваат при воспаление на бубрезите или камен во уринарните патишта и секогаш се проследени со видлива промена на мочта (матна моч, или крв во неа). Она што секогаш не прави внимателни кога детето има болка во стомакот е да не се пропушти воспаление на слепото црево - апендицитис. Во типичните случаи детето има болка во десниот долен дел од стомакот, која може да се шири по должина на ногата, и се потенцира на притисок (но не се советува родителите сами да го притискаат стомакот заради опасност од прскање на слепото црево). Можно е да се јават повраќање, покачена температура, отсуство од столица. Клиничката слика не е секогаш карактеристична, поради што покрај прегледот и лабораториските анализи е потребно и будно следење на симптомите од детскиот хирург или педијатарот. Кај помалите деца често се создава „лажна тревога“ кога поради реакција на стомачните лимфни јазли при респираторен инфект (абдоминален лимфаденит) проследена со стомачна болка, се поставува сомнение за апендицит. Постои можноста за појава на абдоминалната болка при постоење на т.н. дијабетична кетоацидоза (шеќерна болест) на која треба да се помисли секогаш кога детето има и други сомнителни знаци за основното заболување (нејасно слабеење, пиење вода, здив на ацетон). Појавата на болка во стомакот не е секогаш поврзана со органско заболување. Постојат деца, како впрочем и возрасни, кои народски кажано „реагираат со стомакот“ на стресни ситуации. Колку е болката поблиску до папокот, поголема е можноста за постоење на ваков тип реакција.
Извор:Време
|
Рингераја.мк користи "колачиња" за обезбедување подобро корисничко искуство, следење на посетеноста и приказ на огласи. Поставките за прифаќање на колачињата ги прилагодувате во вашиот пребарувач.
Дознајте повеќе.
Испечати
